ताजा खबरहरु    

सरोकारवालाहरुका लागि

निर्वाचन आयुक्तहरूको सङ्क्षिप्त परिचय


वर्तमान निर्वाचन आयुक्तहरू

 

माननीय प्रमुख निर्वाचन आयुक्त दिनेश कुमार थपलिया

 

संखुवासभा जिल्ला खाँदवारी नगरपालिका वडा नं. ८, रातमाटे पाठकगाउँमा पिता स्व. लक्ष्मीप्रसाद थपलिया र माता डम्बरकुमारी थपलियाको कोखबाट जन्मनु भएका माननीय प्रमुख निर्वाचन आयुक्त श्री दिनेश कुमार थपलिया कानून, व्यवस्थापन र शिक्षामा स्नातक तथा जनप्रशासनमा स्नातकोत्तर हुनुहुन्छ ।

करिब ३५ वर्षको सरकारी सेवापछि प्रमुख निर्वाचन आयुक्तमा नियुक्त हुनु भएको उहाँले वि.सं. २०४७ सालमा निजामती सेवामा प्रवेश गर्नु भएको हो । त्यस अघि उहाँले वि.सं. २०४० सालदेखि सवओभरसियर र ओभरसियर पदमा संखुवासभा, मनाङ र रसुवा जिल्लामा काम गर्नु भएको थियो । उहाँले आफ्नो निजामती सेवाको झण्डै दुईतिहाई अवधि संघीय मामिला तथा  स्थानीय विकास मन्त्रालय अन्तर्गत रही काम गर्नु भएको छ । यस क्रममा काठमाडौं र बिराटनगर महानगरपालिकामा कार्यकारी अधिकृत तथा इलाम र चितवन जिल्लामा स्थानीय विकास अधिकारीको जिम्मेवारी सम्हाल्नु भएको थियो । उक्त मन्त्रालयमा रहँदा विभिन्न शाखाको प्रमुख एवं योजना तथा वैदेशिक सहायता समन्वय महाशाखा प्रमुख र मन्त्रालयको प्रवक्ता भई काम गरेको अनुभव छ, उहाँसँग ।  वि.सं. २०५४ सालमा जाजरकोट जिल्लाको प्रमुख जिल्ला अधिकारीको रुपमा रहँदा स्थानीय निकायको दोश्रो निर्वाचन कुशलतापूर्वक सम्पन्न गर्नु भएको उहाँले श्रम मन्त्रालय, राष्ट्रिय योजना आयोग, सूचना तथा संचार मन्त्रालय र सामान्य प्रशासन मन्त्रालयमा रही कार्य सम्पादन गर्नु भएको छ ।  निजामती सेवाको विशिष्ट श्रेणीको पदमा पदोन्नति भएपछि उहाँले पश्चिमाञ्चल विकास क्षेत्रमा क्षेत्रीय प्रशासक, संस्कृति, पर्यटन तथा नागरिक उड्डयन मन्त्रालय, संचार तथा सूचना प्रविधि मन्त्रालय तथा प्रधानमन्त्री तथा मन्त्रिपरिषदको कार्यालयमा सचिव भई कार्य सम्पन्न गरिसक्नु भएको छ । प्रमुख निर्वाचन आयुक्त पदमा नियुक्त हुनुभन्दा अघि उहाँ संघीय मामिला तथा सामान्य प्रशासन मन्त्रालयको सचिव पदबाट सेवा निवृत्त हुनु भएको हो । उक्त मन्त्रालयमा रही स्थानीय तहको पुुनर्संरचना, संघ, प्रदेश र स्थानीय तहको संगठन विकास र जनशक्ति व्यवस्थापन, कर्मचारी समायोजन तथा संघ, प्रदेश र स्थानीय तहको कर्मचारी प्रशासन सम्बन्धी कानून तर्जुमा जस्तो महत्वपूर्ण कार्यमा उहाँको उल्लेखनीय भूमिका रहेको थियो ।

सार्वजनिक प्रशासन, विकास व्यवस्थापन, विकेन्द्रीकरण, स्थानीय स्वशासन र संघीय मामिला, प्रशासनिक पुनर्संंरचना, संगठन विकास र जनशक्ति व्यवस्थापन, सहभागितामूलक योजना र नागरिक सहभागिता, स्थानीय श्रोत परिचालन र व्यवस्थापन, बालमैत्री स्थानीय शासन, वातावरणमैत्री स्थानीय शासन, सामाजिक समावेशीकरण र लैंगिक विकास, संस्थागत सुधार र क्षमता अभिवृद्धि, स्थानीय विकास र सामुदायिक सशक्तिकरण आदि उहाँका विशेष कार्यक्षेत्रहरु रहेका छन् ।

 

उहाँले स्वेदश तथा विदेशका विभिन्न तालिम, अध्ययन भ्रमण, सेमीनार, गोष्ठी, कार्यशाला आदिमा सहभागी भई नेपालको तर्फबाट उच्चस्तरीय प्रतिनिधि मण्डलको नेतृत्व समेत गर्नु भएको छ । हालसम्ममा नेपालको बाजुरा जिल्ला बाहेक सबै ७६ जिल्लाहरुको भ्रमण गर्नु भएका माननीय प्रमुख निर्वाचन आयुक्त श्री थपलियाले विदेशमा जापान, श्रीलंका, थाइल्याण्ड, भारत, मलेसिया, सिंगापुर, फिलिपिन्स, चीन, इन्डोनेसिया, दक्षिण कोरिया, लाओस्, कम्बोडियो, बंगलादेश, भियतनाम, कतार, संयुक्त राज्य अमेरिका, क्यानाडा, ब्राजिल, फ्रान्स, बेलायत, रुस, स्वीट्जरल्याण्ड, जर्मनी, टर्की, इस्टोनिया, इटली, फिनल्याण्ड, मोरक्को, ग्रीस, दक्षिण अफ्रिका, युगाण्डा, इथियोपिया आदि देशको भ्रमण गर्नु भएको छ ।

 

वि.सं. २०५९ सालमा प्रकाशित “नेपालमा विकेन्द्रीकरण र स्थानीय स्वायत्त शासन उपलब्धी र चुनौती” उहाँको पहिलो कृति हो । विभिन्न पत्रपत्रिका, मुखपत्र, स्मारिका, आदिमा विकेन्द्रीकरण, योजना प्रशासन, विकास र नागरिक सशक्तिकरण सम्बन्धी दर्जनौं लेख रचना प्रकाशित छन् । अध्ययन, लेखन, कला, साहित्य एवं गीत संगीतमा विशेष रुचि राख्नु हुने माननीय प्रमुख निर्वाचन आयुक्त श्री थपलियाद्वारा लिखित आधुनिक एवं जागरण गीतका थुप्रै म्यूजिक भिडियोहरु लोकप्रिय रहेका छन् । उहाँले विभिन्न वौद्धिक पत्रिका एवं म्यागजीनहरुको सम्पादन गर्नुका साथै लोक सेवा आयोगका पाठ्यक्रमहरुमा आधारित पुस्तक तथा लेख रचनाहरु प्रकाशित गर्नु भएको छ । उहाँ विशेषतः संघीय मामिला, विकेन्द्रीकरण एवं स्थानीय स्वशासन विज्ञको रुपमा परिचीत हुनुहुन्छ । उहाँका श्रीमती र दुई छोराहरु हुनुुहुन्छ । श्रीमती बैंकिङ क्षेत्रमा कार्यरत हुनुहुन्छ भने जेष्ठ छोरा चिकित्सा क्षेत्र र कनिष्ठ छोरा इन्जिनियरिङ क्षेत्रसँग संलग्न हुनुहुन्छ ।

 

 

माननीय  निर्वाचन आयुक्त नरेन्द्र दाहाल

 फुङ्लिङ् गा.वि.स. वडा नं ७ ताप्लेजुङ्गमा २०१३ सालमा जन्मनु भएका माननीय निर्वाचन आयुक्त नरेन्द्र दाहाल शिक्षाशास्त्र र कानूनमा स्नातक तथा जनप्रशासन, राजनीतिशास्त्र र समाजशास्त्रमा स्नातकोत्तर हुनुहुन्छ ।

 

माननीय निर्वाचन आयुक्त नरेन्द्र दाहालले वि.सं. २०३८ मा निजामती सेवामा प्रवेश गर्नु भएको थियो त्यस अघि उहाँ वि.सं. २०३३ साल देखी शिक्षण पेशामा संलग्न हुनुहुन्थ्यो । उहाँले आफ्नो निजामती सेवा अवधिमा गृह मन्त्रालय अन्तरगत विभिन्न जिल्लाको प्रमुख जिल्ला अधिकारी तथा मध्यमाञ्चल र पूर्वाञ्चल क्षेत्रीय प्रशासन कार्यालयमा निमित्त क्षेत्रीय प्रशासकको जिम्मेवारी निर्वाह गर्नुभएको छ । त्यसैगरी प्रहरी किताबखाना महानिर्देशक, राष्ट्रिय परिचयपत्र व्यवस्थापन केन्द्रमा कार्यकारी निर्देशक भई त्यहाँको समेत कार्यानुभव सँगाल्नु भएको छ ।

 

साथै माननीय निर्वाचन आयुक्त नरेन्द्र दाहालसँग महालेखा नियन्त्रक र निर्वाचन आयोगको सचिव (२०७० सालको अर्को संविधानसभा सदस्य निर्वाचनको समयमा) भई काम गरेको अनुभव छ । उहाँले क्रिटिकल इन्सिडेन्ट म्यानेजमेन्ट (Critical Incident Management),संघीयता र सीमा सम्बन्धी कानून कार्यान्वयन लगायतका विभिन्न विषयमा विदेशमा तालिम लिनुएको छ भने सेवासम्बन्धी अन्य थुप्रै स्वदेशी तालिम पनि प्राप्त गर्नुभएको छ ।

 

उहाँ साहित्य प्रति रूची राख्नुहुन्छ । उहाँका आख्यान (कथा) र नियात्रासम्बन्धी पुस्तकहरू प्रकाशित छन् भने विभिन्न साहित्यिक सस्थाहरूसँग पनि उहाँको आवद्धता रहेको छ ।

 

उहाँले नेपालका प्राय सबै जिल्ला र भारत, चीन, अमेरिका, सिंगापुर, हङ्कङ, थाइल्याण्ड, जर्जिया लगायतका देशहरूको भ्रमण गर्नुभएको छ ।

 

 

 

निर्वाचन आयुक्त इश्वरी प्रसाद पौडेल

 माननीय निर्वाचन आयुक्त ईश्वरीप्रसाद पौड्यालको जन्म वि.सं. २०१५ साल वैशाख ११ गते स्याङ्जा जिल्लाको विचारी चौतारा गा.वि.स. वडा नं.६ मा भएको हो ।उहाँले एशियन इन्स्टिच्यूट अफ टेक्नोलोजीबाट एमएएससी इन्जिनियरिङ (वातावरण),  त्रिभुवन विश्वविद्यालयबाट स्नातकोत्तर (समाजशास्त्र), स्नातकोत्तर (जनप्रशासन), बंगलादेशको युनिभर्सिटी अफ इञ्जिनियरिङ एण्ड टेक्नोलोजीबाट बीएससी (इञ्जिनियरिङ),  लफबर्ग युनिभर्सिटी अफ टेक्नोलोजी, यूकेबाट डिप्लोमा वातावरणीय (इञ्जिनियरिङका लागि परियोजना तयारी),  तथा एशियन इन्स्टिच्यूट अफ टेक्नोलोजीबाट डिप्लोमा (इञ्जिनियरिङ) को शैक्षिक उपाधि हासिल गर्नुभएको छ ।

 
 
निर्वाचन आयुक्त पदमा नियुक्त हुनुभन्दा अघि माननीय ईश्वरीप्रसाद पौड्यालले विभिन्न सरकारी निकायहरूमा उच्च ओहोदामा रही काम गर्नुभएको छ । उहाँसँग शान्ति तथा पुनर्निमाण मन्त्रालय, रक्षा मन्त्रालय तथा जल तथा उर्जा आयोगको सचिवालयमा सचिव पदमा रही काम गरेको अनुभव छ ।
 
यसैगरी माननीय पौड्यालले खानेपानी तथा ढल निकास विभागका महानिर्देशक, अख्तियार दुरुपयोग अनुसन्धान आयोगको प्रवक्ता, योजना महाशाखातथा प्रशासन महाशाखा प्रमुख (सहसचिव) एवं अनुसन्धान अधिकृत, भौतिक योजना तथा निर्माण मन्त्रालय (योजना, अनुगमन तथा मूल्याङ्कन महाशाखा) का प्रमुख, सोही मन्त्रालयका प्रवक्ता (सहसचिव), ‘रुरल वाटर सप्लाइ एण्ड सेनिटेसन सेक्टर मोनिटरिङ एण्ड इभ्यालुएसन युनिट’ का प्रमुख (सिनियर सिनियर डिभिजनल इञ्जिनियर), क्षेत्रीय परियोजना व्यवस्थापन कार्यालय (धनगढी तथा इटहरी) का क्षेत्रीय परियोजना व्यवस्थापक, खानेपानी तथा ढल निकास विभागका सिनियर डिभिजनल इञ्जिनियर रूपमा जिम्मेवारी सम्हालिसक्नुभएको छ । 
 
उहाँले नेपाल शान्ति कोष (प्राविधिक समिति) का अध्यक्ष, सोही कोषका सदस्य सचिव, समन्वय समितिका अध्यक्ष, ग्रामीण खानेपानी आपूर्ति तथा सरसफाइसम्बन्धी विकास बोर्ड (कोष) का सदस्य, सडक अनुगमन तथा मूल्याङ्कनसम्बन्धी उच्चस्तरीय समितिका सदस्य, प्राविधिक शिक्षा तथा तथा व्यवसायिक तालिम परिषदका सदस्य, आर्थिक नीति तथा बजेट विश्लेषण कार्यदलका सदस्य, राष्ट्रिय योजना आयोग (मानव विकास प्रतिवेदन) का सल्लाहकार समितिका सदस्य, भौतिक योजना तथा निर्माण मन्त्रालय (परिवर्तन व्यवस्थापन टिम) का प्रमुखलगायतका पदमा रही कार्यसम्पादन गर्नुभएको छ । 
 
माननीय निर्वाचन आयुक्त पौड्याल नेपाल इञ्जिनियर्स असोसिएसन, सोसाइटी अफ पब्लिक इञ्जिनियर्स् नेपाल, पश्चिम विकास क्षेत्रीय मञ्च, नेपाल जनप्रशासन संघ (पान), नेपाल मध्यस्थता परिषद (नेप्का), बंगलादेश अलम्नाई, एशियन इन्स्टिच्यूट अफ टेक्नोलोजी अलम्नाईको आजीवन सदस्य हुनुहुन्छ । उहाँ सोसाइटी अफ टेक्निकल अडिटर्स् नेपालका उपाध्यक्ष र नेपाल इञ्जिनियरिङ परिषदका सदस्य पनि हुनुहुन्छ ।
 
उहाँ सार्वजनिक खरिद, करार व्यवस्थापन, विवाद निरूपण तथा मध्यस्थता, प्राविधिक परीक्षण, कार्यदक्षता व्यवस्थापन, खानेपानी आपूर्ति तथा खेर गएको पानीको सदुपयोग, तेस्रो पक्षद्वारा गरिने प्राविधिक परीक्षण, करारसम्बन्धी सर्त, करार व्यवस्थापन, अनुगमन तथा मूल्याङ्कन, सीधा वैदेशिक लगानीसम्बन्धी नियामक निकायको ढाँचा सम्बन्धी प्रक्रियालगायतका विषयमा राष्ट्रिय तथा अन्तर्राष्ट्रिय तहमा सञ्चालित उच्चस्तरीय तालिम तथा कार्यशालामा सहभागी हुनुभएको छ । 
 
माननीय निर्वाचन आयुक्त पौड्यालले विश्वविद्यालय शोधपत्रका अतिरिक्त ‘जर्नल अफ जापान वाटर वर्कस् असोसिएसन’ (अंक ७९१ सन् २०००) मा लेख छापिएको छ .  
 
उहाँले आफ्नो क्षेत्रमा पुरयाउनुभएको योगदानस्वरूप नेपाल सरकारले प्रदान गर्ने सुप्रबल जनसेवा श्री पदक तथा एशियन इन्स्टिच्यूट अफ टेक्नोलोजी अलम्नाई असोसिएसनले दिने ‘विशिष्ट अलम्नाई पुरस्कार’ बाट सम्मानित हुनुभएको छ । 
 

ECN Map Center    FAQs    Press Room
SiteLock
Positive SSL Wildcard